دانتوں کی زردی سے پریشان نہ ہوں؟ بہترین نسخہ گھر میں تیار

سفید، چمک دار اور صحت مند دانت ہر شخص کی خواہش ہوتے ہیں، دانتوں کی زردی ختم کرنے کے لیے لوگ مہنگے ترین ٹوتھ پیسٹ اور دیگر بھاری اخراجات برداشت کرتے ہیں لیکن اکثر نتائج توقع کے مطابق نہیں ملتے۔

بڑھتی عمر کے ساتھ دانتوں کی سفیدی کم ہونا ایک فطری عمل ہے، وقت گزرنے کے ساتھ دانتوں کی بیرونی تہہ گھسنے لگتی ہے جس سے اندر موجود زرد رنگ نمایاں ہو جاتا ہے۔ تاہم اگر کم عمری میں ہی دانت پیلے نظر آنے لگیں تو اسے نظر انداز نہیں کرنا چاہیے۔

اس حوالے سے اے آر وائی ڈیجیٹل کے مارننگ شو ’’گڈ مارننگ پاکستان‘‘ میں معروف ہربلسٹ ڈاکٹر بلقیس شیخ نے دانتوں کی زردی ختم کرنے ان کو موتی جیسا سفید اور چمکدار بنانے کیلئے ایک بہترین نسخہ بناکر دکھایا جو نہایت سادہ اور کم خرچ ہے۔

نسخہ بنانے کا طریقہ

ڈاکٹر بلقیس کے مطابق آدھا کپ میتھی دانہ لیں اور اس میں چھ لونگ شامل کرکے اچھی طرح باریک پیس لیں۔ اس کے بعد اس میں آدھا کپ نمک ملا دیں۔ یوں گھریلو منجن تیار ہو جائے گا۔

استعمال کا طریقہ

صبح کے وقت اس پاؤڈر میں سے ایک چمچ لے کر اس میں تھوڑا سا پانی شامل کریں تاکہ پیسٹ بن جائے۔ اسے برش پر لگا کر دانتوں پر اچھی طرح مل لیں۔

ڈاکٹر بلقیس کے مطابق باقاعدگی سے استعمال کرنے سے دانتوں پر جمی میل اور داغ دھبے نمایاں طور پر کم ہو سکتے ہیں اور سفیدی میں بہتری آتی ہے۔ ایسا کرنے سے آپ کے دانتوں کے تمام داغ دھبے ایسے صاف ہوجائیں گے جیسے کبھی تھے ہی نہیں۔