فیس بک میں ایسے دلچسپ فیچر کا اضافہ جو آپ کو ضرور پسند آئے گا

فیس بک میں ایک نیا دلچسپ فیچر متعارف کرایا گیا ہے جو صارفین کو ضرور پسند آئے گا۔

فیس بک میں میٹا اے آئی پر مبنی فیچر متعارف کرایا گیا ہے جس کے ذریعے آپ اپنی پروفائل فوٹو کو متحرک یا انیمیٹ کرسکتے ہیں۔

میٹا کی جانب سے جاری بیان میں بتایا گیا کہ اب آپ اپنی پروفائل فوٹو کو متحرک کرسکتے ہیں۔

بیان کے مطابق کسی بھی تصویر کو پرمزاح انیمیشن میں چند سیکنڈ میں تبدیل کیا جاسکتا ہے۔

بیان میں مزید بتایا گیا کہ اس حوالے سے پہلے سے پری سیٹ انیمیشنز جیسے نیچرل، پارٹی ہیٹ، ویو، ہارٹ اور confetti کے آپشنز دستیاب ہوں گے تاکہ پروفائل فوٹو کو زندگی دی جاسکے۔

اسی طرح آنے والے مہینوں میں مزید انیمیشن آپشنز کا اضافہ بھی کیا جائے گا تاکہ اپنی پسند کے مطابق پروفائل فوٹو کو متحرک کرسکیں۔

فیس بک کی جانب سے ایک اور فیچر ری اسٹائل کو بھی متعارف کرانے کا اعلان کیا گیا۔

اس فیچر میں اے آئی ٹیکنالوجی کو استعمال کرکے اسٹوریز میں تصاویر کو تبدیل کیا جاسکتا ہے۔

مثال کے طور پر کسی دوست کی عام تصویر کو کسی خاکے یا کارٹون میں تبدیل کرنا ممکن ہوگا۔

اس فیچر کے لیے بھی پری سیٹ آپشنز صارفین کو دستیاب ہوں گے اور صارف فوٹو کو تحریری ہدایات سے بھی اپنی پسند کے مطابق تبدیل کرسکیں گے۔