ہماری تیاری مکمل ہے، ہمارا ردعمل تیز اور فیصلہ کن ہوگا، خواجہ آصف کا بھارتی وزیر دفاع کے بیان پر ردعمل

وزیر دفاع خواجہ آصف نےکہا ہےکہ  بھارتی وزیر  دفاع  راج ناتھ کی جانب سے دہرائے جانے  والا بیانیہ مایوسی کی عکاسی کرتا ہے۔

ایکس پر جاری بیان میں  بھارتی وزیر دفاع کے بیانات  پر ردعمل دیتے ہوئے خواجہ آصف  نےکہا کہ پہلگام فالس فلیگ آپریشن بین الاقوامی طور پر بھی ثابت نہ ہوسکا، بھارت کی طرف سے اس نوعیت کی دھمکی آمیز زبان نئی نہیں بلکہ ایک متوقع جاہلانہ حرکت ہے۔

 خواجہ آصف کا کہنا تھا کہ  یہ بالکل واضح ہےکہ بھارت اپنی اندرونی کمزوریوں کو بیرونی بنا کر پیش کرتا ہے، بھارت گمراہ کن الزامات کی آڑ میں کشیدگی کو ہوا دیتا ہے تاکہ اسے مخصوص سیاسی مفادات حاصل ہو، تاریخی طور پر یہ واضح ہے کہ ناکام مہم جوئی کے ہمیشہ سنگین نتائج برآمد ہوتے ہیں۔

وزیردفاع کا کہنا تھا کہ  معرکہ حق ہماری یادوں میں آج بھی زندہ ہے اور آئندہ ہمارا رد عمل مزید مضبوط اور فیصلہ کن ہوگا،  ہم یہ واضح کرنا چاہتے ہیں کہ پاکستان امن اور علاقائی استحکام کے لیے پرعزم ہے۔

 ان کا کہنا تھا کہ پاکستان کی تیاری مکمل ہے اور ہمارا ردعمل تیز، متوازن اور فیصلہ کن ہوگا، راج ناتھ سنگھ کو  واضح کرنا چاہتا ہوں کہ دو  ایٹمی طاقتوں کے درمیان جنگ کا تصور  بھی ناقابل فہم اور خطرناک نتائج کا حامل ہوگا،  بھارت کے لیے بہتر یہی ہوگا کہ وہ اپنی اسٹریٹیجک اور سفارتی دائرے میں بڑھتی ہوئی بے چینی کا سامنا کرے۔