پاکستانی فوج کا کہنا ہے کہ بلوچستان کے ضلع خاران میں سکیورٹی فورسز کے ایک آپریشن میں ’’فتنہ الہندوستان‘ سے تعلق رکھنے والے 12 شدت پسندوں کو ہلاک کیا گیا ہے۔
پاکستان کی فوج کی جانب سے یہ بیان ایسے وقت میں جاری کیا گیا ہے، جب بلوچستان کے ضلع خاران میں جمعرات کو مسلح افراد کے حملے نے علاقے میں خوف و ہراس پھیلا دیا تھا۔
مسلح افراد کی جانب سے دن دیہاڑے سرکاری اور نجی بینک لوٹنے اور املاک کو نقصان پہنچانے کی بھی تصدیق ہوئی ہے۔
عینی شاہدین کے مطابق خاران شہر اور اس سے ملحقہ علاقوں میں طویل عرصے سے بدامنی کے واقعات پیش آ رہے ہیں۔ تاہم جمعرات کے روز شہر میں مسلح افراد کی بڑی تعداد کے داخل ہونے اور مختلف علاقوں میں حملے اپنی نوعیت کا پہلا واقعہ تھا۔
مسلح افراد کے حملے میں نہ صرف شہر میں سٹی پولیس سٹیشن اور اس میں موجود گاڑیوں کو نقصان پہنچا بلکہ اس حملے کے نتیجے میں وہاں حوالات میں موجود کئی قیدی بھی فرار ہو گئے۔
