ٹوئنٹی ورلڈ کپ کا آغاز، گوگل نے خصوصی ڈوڈل متعارف کرا دیا

نیویارک: آئی سی سی مینز ٹی ٹوئنٹی ورلڈ کپ 2026 کے آغاز پر گوگل نے ایک خصوصی ڈوڈل متعارف کرادیا ہے۔

رپورٹس کے مطابق گوگل کی جانب سے متعارف کرایا گیا یہ ڈوڈل شوخ اور دلکش رنگوں، نمایاں اشکال اور تھری ڈی انداز میں تیار کیا گیا ہے جو ٹی ٹوئنٹی کرکٹ کے جوش، رفتار اور سنسنی کی بھرپور عکاسی کرنا نظر آرہا ہے۔

واضح رہے کہ آئی سی سی مینز ٹی ٹوئنٹی ورلڈ کپ کا دسواں ایڈیشن آج 7 فروری سے شروع ہوچکا ہے، جسے کرکٹ کی تاریخ کے سب سے سخت مقابلوں میں سے ایک قرار دیا جا رہا ہے۔

بھارت اور سری لنکا اس میگا ایونٹ کی مشترکہ میزبانی کر رہے ہیں، جہاں 20 ٹیمیں آٹھ مختلف وینیوز پر ٹرافی کے حصول کے لیے مدِ مقابل ہوں گی۔

ٹورنامنٹ کا افتتاحی میچ آج کولمبو میں پاکستان اور نیدرلینڈز کے درمیان کھیلا جارہا ہے۔

ایک ماہ تک جاری رہنے والے اس میگا ایونٹ میں مجموعی طور پر 55 میچز کھیلے جائیں گے۔ ایونٹ کا فائنل 8 مارچ 2026 کو احمد آباد یا کولمبو میں کھیلا جائے گا۔