افغان طالبان نے پاکستان کے خلاف حملوں میں کن ڈرونز کا استعمال کیا اور اُن کی صلاحیت کتنی تھی؟

طالبان کی وزارتِ دفاع نے اپنے ایک بیان میں دعویٰ کیا کہ اس نے پاکستان کے تین شہروں میں کئی مقامات پر ڈرونز کا استعمال کرتے ہوئے ’متعدد فضائی حملے کیے ہیں۔‘ اُن کے مطابق یہ اقدام پاکستانی فضائی حملوں کے جواب میں اٹھایا گیا ہے۔

طالبان حکومت کے پاس چونکہ روایتی فضائیہ نہ ہونے کے برابر ہے اس لیے انھوں نے فضائی حملوں کی غرض سے دھماکہ خیز ڈرونز کا سہارا لیا گیا۔

یاد رہے کہ پاکستانی میڈیا کی رپورٹس کے مطابق 27 فروری کو میڈیا بریفنگ کے دوران ڈی جی آئی ایس پی آر احمد شریف چوہدری نے کہا تھاکہ افغان طالبان رجیم نے سبی، ایبٹ آباد اور نوشہرہ میں حملوں کی غرض سے کچھ بیسک (انتہائی بنیادی ٹیکنالوجی کے حامل) ڈرونز استعمال کرنے کی کوشش کی تھی۔ تاہم، انھوں نے دعویٰ کیا کہ ’ہمارے اینٹی ڈرون سسٹمز نے اس کوشش کو ناکام بنا دیا۔

معلوم ہوا ہے کہ ان کارروائیوں میں طالبان کی عبوری حکومت نے پاکستان کے خلاف دو قسم کے ڈرونز استعمال کیے ہیں، جن میں سے کچھ خودکش ڈرونز جبکہ چند کواڈ کاپٹرز (ایسے ڈرون جو چار پروں کی مدد سے اڑتے ہیں) شامل ہیں۔

 ’عین ممکن ہے کہ طالبان حکومت کے پاس ڈرون کے پرزے خود بنانے کی صلاحیت نہ ہو اور اس بات کا امکان ہے کہ یہ پرزے انھوں نے دوسرے ممالک سے خرید کر افغانستان میں انھیں اسمبل (جوڑا) کیا ہو۔‘