خفیہ معلومات شیئر کرنے کا الزام،چار سول ملازمین کو قید کی سزائیں

اسلام آباد کی ایک مقامی عدالت نے وزارتِ دفاعی پیداوار کے چار ملازمین کو غیرملکی ’ایجنٹ‘ کے ساتھ حساس معلومات شیئر کرنے پر قید کی سزائیں سنا دی ہیں۔

آفیشل سیکرٹس ایکٹ عدالت کے جج طاہر عباس سپرا کے فیصلے کے مطابق ان چاروں افراد کو آفیشل سیکرٹس ایکٹ 1923 کی دفعات تین اور چار کے تحت سزائیں سنائی گئی ہیں۔

عدالتی فیصلے کے مطابق صفدر رحمان نامی شخص کو 10 برس قید، تنزیل الرحمان کو پانچ برس، محمد وقار کو پانچ برس اور محمد طاہر کو بھی پانچ برس قید کی سزائیں سنائی گئی ہیں۔

اس مقدمے میں دو افراد کو بری بھی کیا گیا ہے کیونکہ عدالت کے مطابق ان افراد نے کبھی ’غیر ملکی ایجنٹ، روسی سفارتکار سے ملاقات نہیں کی اور نہ غیر ملکی ایجنٹ کو براہ راست خفیہ معلومات پہنچائی۔‘