بلوچستان،دہشتگرد کارروائیوں میں ملوث ٹی ٹی اے کا کارندہ گرفتار ،حمزہ شفقات

دہشت گرد کارروائیوں میں ملوث کالعدم تحریک طالبان افغانستان کا کارندہ بلوچسان سے گرفتار کرلیا گیا، گرفتار دہشت گرد کا بھائی کالعدم ٹی ٹی پی پکتیکا کا امیر ہے۔دہشت گرد پہلے بھی گرفتار ہوچکا اور انسانی ہمدردی کی بنیاد پر عام افغان شہری سمجھ کر واپس بھیج دیا تھا۔ایڈیشنل چیف سیکرٹری داخلہ نے بتایاکہ جو لڑکا پکڑا گیا ہے اس کا تعلق تحریک طالبان افغانستان (ٹی ٹی اے)سے ہے۔وزیر داخلہ بلوچستان ضیا لانگو کے ہمراہ پریس کانفرنس کرتے ہوئے ایڈیشنل چیف سیکریٹری داخلہ حمزہ شفقات نے کہا کہ ایک سال میں ہزاروں انٹیلی جنس آپریشن ہو چکے ہیں۔

افغان شہری دہشتگردی کی کارروائیوں میں ملوث ہیں، ٹی ٹی اے اور کالعدم ٹی ٹی پی مل کر ہمارے صوبے کے اندر وارداتیں کرتے ہیں۔ضیا لانگو نے کہا کہ کوئی پاکستان کی جانب میلی آنکھ سے دیکھے گا اسے بھرپور جواب دیا جائے گا، افغان شہریوں نے نادرا کے جعلی آئی ڈی کارڈ بنوائے ہوئے ہیں، دہشتگردی کے خلاف قوم متحد ہے۔صوبائی وزیر داخلہ نے کہا کہ ملک دشمن عناصر سازشوں میں مصروف ہیں، ان کی سازشوں کو ناکام بنائیں گے۔ڈی آئی جی سی ٹی ڈی نے کہا کہ دہشتگرد تنظیمیں افغانستان کےاندر سے کارروائیاں کررہی ہیں۔