ماشکیل میں پنجاب سے تعلق رکھنے والے نہتے مزدوروں کا قتل قابل مذمت ہے ، گورنر بلوچستان

گورنربلوچستان جعفرخان مندوخیل نے بلوچستان کے علاقے ماشکیل میں پنجاب سے تعلق رکھنے والے نہتے مزدوروں کے قتل پر گہرے دکھ اور افسوس کا اظہار کیا ہے۔ ایک بیان میں انہوں نے کہا کہ ہر مزدور صرف ایک مزدور نہیں ہے بلکہ وہ اپنے پورے خاندان کا واحد کفیل اور سہارا ہے۔اسطرح ایک مزدور کا نقصان ان کے زیر کفالت افراد کیلئے متعدد معاشی و معاشرتی مشکلات پیدا کرتا ہے۔ انہوں نے قتل کیے جانے والے مزدوروں کی مغفرت اور سوگوار خاندانوں کیلئے صبر و ہمت کی دعا کی۔ انہوں نے غمزدہ خاندانوں کے ساتھ مکمل یکجہتی کا اظہار کیا اور انہیں یقین دلایا کہ ہم آپکے غم میں برابر کے شریک ہیں۔