محض 38 ماہ میں تعمیر ہونیوالا دنیا کا سب سے بڑا ریلوے اسٹیشن کس ملک میں واقع ہے؟

ٹرین کا سفر تو لگ بھگ ہر فرد نے ہی کیا ہوتا ہے اور ریلوے اسٹیشنز کو بھی دیکھا ہوگا۔

مگر کیا آپ کو معلوم ہے کہ دنیا کا سب سے بڑا ریلوے اسٹیشن کس ملک میں واقع ہے؟

اگر نہیں جانتے تو جان لیں کہ دنیا کا سب سے بڑا ریلوے اسٹیشن میں چین میں واقع ہے اور درحقیقت کسی تعمیراتی عجوبے سے کم نہیں۔

چین پہلے ہی متعدد تعمیراتی عجائب کے لیے جانا جاتا ہے جیسے دنیا کے حیرت انگیز برجز سے لے دنیا کا سب سے بڑا ہائی اسپیڈ ریلوے سسٹم۔

چونگ چنگ ایسٹ ریلوے اسٹیشن جنوب مغربی چین میں واقع ہے اور رقبے کے لحاظ سے دنیا کا سب سے بڑا ریلوے اسٹیشن ہے جسے جون 2025 میں عوام کے لیے کھولا گیا۔

یہ ریلوے اسٹیشن ایک کروڑ 30 لاکھ اسکوائر فٹ رقبے پر پھیلا ہے یعنی 170 فٹبال گراؤنڈز کے برابر جبکہ نیویارک کے گرینڈ سینٹرل کے مقابلے میں چونگ چنگ اسٹیشن 5 گنا بڑا ہے۔

اس ریلوے اسٹیشن میں 15 پلیٹ فارمز اور 29 ٹریکس موجود ہیں اور وہاں رش کے وقت 16 ہزار مسافر فی گھنٹہ آتے ہیں۔

اس کی چھت کے لیے 16 ہزار 500 ٹن اسٹیل کا استعمال کیا گیا ہے۔

مگر اس کی سب سے خاص بات اس کی تیز رفتاری سے تعمیر ہے اور وہ بھی ایک پہاڑی کی چوٹی پر۔

چونگ چنگ کا علاقہ پہاڑی ہے اور اسی وجہ سے وہاں ٹرانسپورٹیشن کے نظام کی تعمیر بہت مشکل سمجھی جاتی تھی۔

اسے 40 ہزار انسانی ورکرز اور روبوٹیک مشینری کی فوج کی مدد سے محض 38 ماہ کے اندر تعمیر کیا گیا۔

بظاہر یہ وقت زیادہ محسوس ہوتا ہے مگر بیشتر ممالک میں ایسے بڑے منصوبوں کی منظوری دینے میں ہی اس سے زیادہ وقت لگ جاتا ہے۔