جو ڈاکو سرنڈر نہیں کرے گا وہ مرے گا، ضیا الحسن لنجار

کراچی: وزیر داخلہ سندھ ضیا الحسن لنجار کا کہنا ہے کہ جو ڈاکو سرنڈر نہیں کرے گا وہ مرے گا۔

وزیر داخلہ سندھ ضیا الحسن لنجار نے گھوٹکی کے علاقے رونتی میں قائم بند کا دورہ کیا اور اس دوران سیکیورٹی اقدامات سمیت ضلع میں امن و امان کی مجموعی صورت حال کا جائزہ لیا۔

انہوں نے کہا کہ موقع دے رہا ہوں جن کو قانون کے سامنے سرنڈر کرنا ہے کردے، ڈاکوؤں کو جلد بڑا سرپرائز دیں گے، جدید ہتھیار، ایڈوانس ڈرون، آلات کا آرڈر دے دیا ہے، کچہ ایریا میں ریاستی رٹ کے قیام تک میگا آپریشن نجات مہران جاری رہے گا۔

وزیر داخلہ نے کہا کہ جرائم پیشہ عناصر کے خلاف بلا تفریق کارروائی جاری ہے، عوام کے جان و مال کا تحفظ اولین ترجیح ہے، سندھ پولیس کی قربانیاں قابل تحسین ہیں، حکومت پولیس کو ہر ممکن وسائل فراہم کرے گی۔

یہ پڑھیں: کراچی میں دوران ڈکیتی قتل کی وارداتیں نصف ہوگئیں، وزیر داخلہ سندھ

ضیا لنجار نے کہا کہ پولیس اور رینجرز نے کچہ ایریا میں اگلے مورچوں کی جانب پیش قدمی کا آغاز کردیا ہے، کچے میں امن و امان کے قیام کا صدر پاکستان کا خواب جلد پورا ہوگا، وزیر اعلیٰ سندھ کی میگا آپریشن میں پولیس کو بھرپور حمایت حاصل ہے۔

علاوہ ازیں ڈی آئی جی ناصر آفتاب نے وزیر داخلہ کو رینج اور اضلاع میں امن و امان کی صورت حال پر بریفنگ دی جس میں کچے کے علاقوں کو جرائم سے پاک بنانے کے لیے جاری اقدامات پر خصوصی توجہ دی گئی۔