گلف سٹریم لگژری طیارہ وزیراعلیٰ مریم نواز کے لیے خریدا گیا یا ائیر پنجاب کے لیے؟

پاکستانی ذرائع ابلاغ اور سوشل میڈیا پر پنجاب حکومت کی جانب سے ایک لگژری طیارے کی خریداری پر بحث ابھی تک رکی نہیں اور یہ سوال کیا جا رہا ہے کہ آیا یہ جہاز وزیراعلیٰ پنجاب کے لیے خریدا گیا یا ائیر پنجاب کے لیے؟

گذشتہ دنوں کے دوران اسی حوالے سے دو حکومتی شخصیات نے جو وضاحت پیش کی، یہ سوال اسی وجہ سے پیدا ہوا۔

اس سے قبل پاکستان میں پنجاب حکومت کی جانب سے لگژری طیارے کی خریداری کی اطلاعات کو اس وقت تقویت ملی تھی جب اس معاملے پر حکومت کا موقف سامنے آیا تھا۔

کچھ روز قبل ایک پریس کانفرنس کے دوران پنجاب کی وزیر اطلاعات اعظمیٰ بخاری سے ایک صحافی کی جانب سے جب اس بارے میں سوال پوچھا گیا تو انھوں نے کہا تھا کہ یہ ائیر پنجاب‘ بنانے کی ایک کڑی ہے۔

لیکن منگل کے روز وزیر اعظم کے مشیر برائے سیاسی امور رانا ثنا اللہ نے سما ٹی وی پر ابصار عالم کے پروگرام میں کہا کہ ’تمام وزرائے اعلیٰ کے پاس جہاز ہیں۔ جہاز صوبہ پنجاب کی ملکیت ہو گا۔ وہ مریم نواز نے کوئی اپنی ذات کے لیے نہیں خریدا یا اپنی ذات کے لیے کوئی اثاثہ نہیں بنایا۔