گوادر بندرگاہ پر ایک اور کارگو جہاز کامیابی سے لنگر انداز ہو گیا، جنید انوار چوہدری

وفاقی وزیر بحری امور محمد جنید انوار چوہدری نے گوادر بندرگاہ کی بڑھتی ہوئی ٹرانس شپمنٹ صلاحیت کو اجاگر کرتے ہوئے کہا ہے کہ گہرے سمندر کی اس بندرگاہ پر ایک اور کارگو جہاز کامیابی سے لنگر انداز ہوا ہے، جو خطے میں گوادر کے بڑھتے ہوئے کردار کی واضح علامت ہے۔ جاری اعلامیہ کے مطابق پیر کو وفاقی وزیر نے بتایا کہ ایم وی یوان ہانگ ویئے گوادر بندرگاہ پر 11 مئی کو صبح 10 بج کر 15 منٹ پر لنگر انداز ہوا، جس پر تقریبا 34 ہزار ٹن مال اور 20 ہزار کے قریب اشیا موجود تھیں۔انہوں نے بتایا کہ یہ جہاز ٹرانس شپمنٹ سرگرمیوں میں مصروف ہے اور اس پر موجود سامان ابو ظہبی اور کویت کے لیے ہے، جسے گوادر بندرگاہ پر اتارا جائے گا۔ جنید انوار چوہدری نے اس پیش رفت کو خطے کی بحری تجارت میں گوادر کے بڑھتے ہوئے کردار کے لیے مثبت قرار دیتے ہوئے کہا کہ اس نوعیت کی سرگرمیاں عالمی سطح پر گوادر کی سہولیات اور اس کی اسٹریٹجک اہمیت پر بڑھتے ہوئے اعتماد کی عکاس ہیں۔ انہوں نے کہا کہ حکومت بندرگاہ کے بنیادی ڈھانچے اور سہولیات کو مزید بہتر بنانے کے لیے پرعزم ہے تاکہ بین الاقوامی شپنگ ٹریفک کو مزید متوجہ کیا جا سکے۔