معصوم مزدوروں کے خون سے ہاتھ رنگنے والے دہشتگرد کسی رعایت کے مستحق نہیں،شاہد رند

معاون وزیر اعلیٰ بلوچستان برائے اطلاعات شاہد رند نے ضلع کیچ میں بے گناہ مزدوروں کے قتل کے واقعے کی شدید مذمت کرتے ہوئے اسے انتہائی افسوسناک اور انسانیت سوز قرار دیا ہے۔جاری بیان میں شاہد رند نے کہا کہ معصوم شہریوں کو نشانہ بنانے والے عناصر نہ صرف انسانیت بلکہ بلوچستان کے پ±رامن مستقبل کے بھی دشمن ہیں۔ انہوں نے کہا کہ دہشت گردوں نے نہتے مزدوروں کو شہید کرکے بلوچستان کی ترقی، امن اور روزگار کے خلاف مذموم سازش کی ہے، تاہم ایسے بزدلانہ اقدامات سے عوام کے حوصلے پست نہیں کیے جا سکتے۔معاون وزیر اعلیٰ نے کہا کہ معصوم مزدوروں کے خون سے ہاتھ رنگنے والے دہشت گرد کسی رعایت کے مستحق نہیں اور ان کے خلاف قانون کے مطابق سخت کارروائی عمل میں لائی جائے گی۔ انہوں نے کہا کہ حکومت شہداءکے اہل خانہ کے غم میں برابر کی شریک ہے اور ان کے دکھ کو اپنا دکھ سمجھتی ہے۔