نوجوان دشمن کے کہنے پر پہاڑوں پر جارہے ہیں انہیں یہ راستہ ترک کرناہوگا

صوبائی وزیرداخلہ میر ضیاءاللہ لانگو نے سیکورٹی انتظامات کا جائزہ لینے کیلئے اتوار کو کوئٹہ شہر کے مختلف علاقوں ائرپورٹ روڈ،کچلاک اور مغربائی پاس کا دورہ کیا وزیرداخلہ بلوچستان نے دورے کے موقعے پر سیکورٹی انتظامات کا جائزہ لیاوزیرداخلہ بلوچستان میر ضیاءاللہ لانگو نے اس موقع پر بات چیت کرتے ہوئے کہا کہ جشن آزادی کسی بھی قوم کے لئے خاص دن ہوتا ہے ،اس دن کو زندہ قومیں پرجوش انداز سے مناتی ہیں،14اگست جشن آزادی کو اہل بلوچستان اور کوئٹہ بھی بھرپورجوش وجذبے کے ساتھ منارہی ہے،عوام کو سیکورٹی فراہم کرنے کی ذمہ داری حکومت کی ہے،یوم آزادی کے موقعے پر فل پروف سیکورٹی فراہم کی گئی ہے۔انہوں نے کہا کہ نوجوانوں کو یہی پیغام دیتا ہوں کہ آزادی اللہ تعالیٰ کی طرف سے ایک نعمت ہے،نوجوان تعلیم ، ٹیکنالوجی اور سائنس کے میدان میں اپنی صلاحیتیں بروئے کار لاکرملک و قوم کی خدمت کرے۔انہوں نے کہا کہ وہ نوجوان جو دشمن کے کہنے اورورغلانے پر پہاڑوں پر جارہے ہیں انہیں یہ راستہ ترک کرناہوگا پاکستان ہمارا ملک اور بلوچستان ہمارا صوبہ ہے نوجوان اس لاحاصل جنگ کو چھوڑ کر اپنے ملک و قوم کی خدمت کرے۔انہوں نے کہا کہ :تعلیم ،ٹیکنالوجی اور سیاست کی میدان میں آکر نوجوان اپنی قوم اور ملک کی خدمت کرے،حقوق حاصل کرنے کا بہترین طریقہ دنیا بھرمیں جمہوری انداز میں ہے نوجوان پارلیمنٹ میں آکر اپنے صلاحیتیں بروئے کار لاکر بلوچستان کو خوشحال بنائے۔