کراچی کے جناح اسپتال میں مبینہ غفلت اور لاپرواہی کی وجہ سے خاتون اور نومولود نے دم توڑ دیا

کراچی کے جناح اسپتال میں مبینہ غفلت اور لاپرواہی کی وجہ سے خاتون اور نومولود نے دم توڑ دیا۔

کراچی کے جناح پوسٹ گریجویٹ میڈیکل سینٹر میں مبینہ غفلت اور لا پرواہی کا ایک اور واقعہ سامنے آگیا، آئی سی یو بیڈ نہ ملنے کے باعث حاملہ خاتون نے گیسٹرو وارڈ میں بچے کو جنم دیا، جہاں دورانِ زچگی ماں اور نومولود دونوں جاں بحق ہوگئے۔ 

اسپتال انتظامیہ کے مطابق متاثرہ خاتون گائنی وارڈ نائن اے میں داخل تھی، تاہم گیسٹرو کی شکایت پر اسے گائنی وارڈ سے گیسٹرو وارڈ منتقل کیا گیا۔ خاتون کی طبیعت خراب ہونے پر گائنی وارڈ سے رابطہ بھی کیا گیا۔ 

انتظامیہ کے مطابق گائنی وارڈ میں بیڈ خالی ہونے کے باوجود خاتون کو وہاں بیڈ نہیں دیا گیا۔ گیسٹرو وارڈ کے ڈاکٹرز نے بھی یہی الزام عائد کیا ہے۔ 

واقعے کی اطلاع ملتے ہی جناح اسپتال میں تحقیقاتی کمیٹی تشکیل دے دی گئی ہے۔ 

قائم مقام ایگزیکٹو ڈائریکٹر جناح اسپتال ڈاکٹر سلمان کا کہنا ہے کہ واقعے کی مکمل تحقیقات کی جائیں گی، ذمہ داروں کا تعین کیا جائے گا اور غفلت ثابت ہونے پر کارروائی عمل میں لائی جائے گی۔