بیرک گولڈ کا ریکوڈک منصوبے پر نظرثانی کی مدت میں 12 ماہ کی توسیع

کوئٹہ۔ بیرک کمپنی نے ریکوڈک منصوبے کے طویل المدتی امکانات پر اعتماد کا اظہار کرتے ہوئے سیکیورٹی صورتحال کے پیش نظر جاری نظرثانی (ریویو) کی مدت میں مزید 12 ماہ کی توسیع کا اعلان کر دیا ہے، جبکہ اس دوران منصوبے کی ترقیاتی سرگرمیاں سست کر دی جائیں گی تاہم ان کی نگرانی جاری رہے گی۔کمپنی کی جانب سے جاری بیان کے مطابق 5 فروری 2026 کو اعلان کردہ ابتدائی جائزے کے نتائج اور پاکستان و مشرقِ وسطیٰ میں حالیہ سیکیورٹی صورتحال میں اضافے کے بعد یہ فیصلہ کیا گیا ہے کہ جولائی سے نظرثانی کے عمل کو مزید ایک سال تک بڑھایا جائے تاکہ منصوبے کے ممکنہ اثرات اور حکمت عملی کا جامع انداز میں جائزہ لیا جا سکے۔
بیان میں کہا گیا ہے کہ اس توسیع کے دوران ترقیاتی کام مکمل طور پر بند نہیں کیے جائیں گے بلکہ انہیں کم رفتار کے ساتھ جاری رکھا جائے گا اور منصوبہ بدستور فعال انتظامی نگرانی میں رہے گا۔کمپنی نے مزید کہا کہ نظرثانی کی مدت میں اضافے اور ترقیاتی رفتار میں کمی کے باعث پہلے سے طے شدہ بجٹ اور ٹائم لائنز متاثر ہونے کا امکان ہے۔ اس حوالے سے مزید تفصیلات مناسب وقت پر مارکیٹ کو فراہم کی جائیں گی۔یاد رہے کہ ریکوڈک منصوبہ پاکستان کے اہم معدنی وسائل کے منصوبوں میں شمار ہوتا ہے، جس میں بیرک کمپنی کلیدی شراکت دار ہے اور اس کی پیش رفت پر ملکی و بین الاقوامی سطح پر گہری نظر رکھی جا رہی ہے۔