وزیر اعلیٰ بلوچستان کی جانب سے ساکران میں کیڈٹ کالج کے قیام کا اقدام قابل تحسین ہے

سابق رکن قومی اسمبلی محمد اسلم بھوتانی نے کہا ہے کہ ہم ساکران کیڈٹ کالج کی فراہمی پر وزیر اعظم پاکستان اور وزیر اعلی بلوچستان کا تہہ دل سے مشکور ہیں۔ انہوں نے اپنے ایک بیان میں کہا کہ چند ماہ قبل سابق وزیر اعلی بلوچستان سردار محمد صالح بھوتانی نے وزیر اعظم پاکستان میاں شہباز شریف سے اسلام آباد میں ملاقات کی اور ملاقات میں وزیر اعظم پاکستان سے درخواست کی تھی کہ حب میں ایک بہترین تعلیمی ادارے کی اشد ضرورت ہے ہمارے نوجوان اعلی تعلیم کے لیے دیگر اضلاع یا صوبے جانے پر مجبور ہیں جس پر وزیر اعظم پاکستان میاں شہباز شریف اور وزیر اعلی بلوچستان میر سرفراز بگٹی نے آپس میں مشاورت کے بعد ساکران کے نواحی علاقے میں ساکران کیڈٹ کالج کی منظوری دیدی انہوں نے کہا کہ وزیر اعظم پاکستان میاں شہباز شریف کی خصوصی دلچسپی سے وزیر اعلی بلوچستان میر سرفراز بگٹی کی جانب سے ساکران میں کیڈٹ کالج کے قیام کا اقدام قابل تحسین ہے اور ساکران کے جس جگہ کا تعین کیا گیا ہے وہ بھی بہترین ہے۔