دہشتگرد انسانیت اور ملک کے دشمن ہیں اور انہیں عبرتناک انجام تک پہنچایا جائےگا،وزیر ریلوے

وفاقی وزیر ریلوے محمد حنیف عباسی نے کوئٹہ میں چمن پھاٹک کے قریب ہونے والے دھماکے کی شدید مذمت کرتے ہوئے اسے بزدلانہ دہشت گردی قرار دیا ہے اور کہا ہے کہ ایسے حملے قومی عزم کو کمزور نہیں کر سکتے۔اپنے بیان میں وفاقی وزیر ریلوے نے کہا کہ بھارت اور افغانستان میں موجود پاکستان دشمن عناصر دہشت گردی کی سرپرستی کر رہے ہیں اور دشمن قوتیں پاکستان میں بدامنی پھیلانے کے لیے مذموم کارروائیوں میں ملوث ہیں۔ انہوں نے کہا کہ بھارت اور افغانستان سے چلنے والے دہشت گرد نیٹ ورکس کے ناپاک عزائم کبھی کامیاب نہیں ہونے دیے جائیں گے۔محمد حنیف عباسی کے مطابق کوئٹہ کینٹ سے آنے والی شٹل ٹرین چمن پھاٹک کے قریب دھماکے کی زد میں آئی، جس کے نتیجے میں انجن سمیت تین کوچز پٹری سے اتر گئیں جبکہ دو کوچز الٹ گئیں۔انہوں نے بتایا کہ واقعے کے فوری بعد سیکیورٹی فورسز نے علاقے کو گھیرے میں لے کر ریسکیو آپریشن شروع کر دیا جبکہ امدادی کارروائیوں کے لیے ریسکیو ٹرک اور ریلیف ٹرین بھی جائے وقوعہ پر روانہ کر دی گئی ہیں۔