کوئٹہ: آن ڈیوٹی تیزاب گردی کا شکار ڈاکٹر ماہ نور کے بھائی کا بیان سامنے آگیا

کوئٹہ کے سنڈیمن اسپتال میں تیزاب گردی کا شکار ہونے والی ڈاکٹر ماہ نور کے بھائی کا بیان سامنے  آگیا۔

یہ افسوسناک واقعہ ہفتے کی دوپہر پیش آیا تھا، اس حوالے سے ماہ نور کے بھائی فرحت خان کا ایک پیغام سوشل میڈیا کی زینت بنا ہوا ہے۔

فرحت خان کا کہنا ہے کہ ‘میری بہن ڈاکٹر ماہ نور کے ساتھ انتہائی دلخراش واقعہ اس وقت پیش آیا جب وہ سرجری وارڈ میں اپنی ڈیوٹی سرانجام دے رہی تھیں، اس دوران ان پر تیزاب پھینکا گیا’۔

متاثرہ ڈاکٹر کے بھائی نے اپیل کرتے ہوئے کہا ‘اس وقت جس اذیت سے میں، میرے اہلخانہ گزر رہے ہیں اس کا اندازہ لگانا بہت مشکل ہے، میں آپ سب سے درخواست کرتا ہوں کہ اس مشکل وقت میں ہمارے ساتھ کھڑے ہوں، اللہ ہمیں اور ڈاکٹر ماہ نور کے والدین کو صبر عطا فرمائے’۔

واضح رہے کہ کوئٹہ کے سنڈیمن اسپتال میں ایک شخص نے لیڈی ڈاکٹر پر تیزاب پھینک دیا تھا جس وہ شدید متاثر ہوئیں۔

متاثرہ خاتون ڈاکٹر کو اسپتال میں ابتدائی طبی امداد فراہم کی گئی جس کے بعد انہیں علاج کے لیے نجی اسپتال منتقل کیا گیا اور پھر بہتر سہولیات اور علاج کیلئے ائیر ایمبولینس سے کراچی منتقل کیا گیا۔