سانحہ زیارت میں شہید 3 پولیس اہلکاروں کی نمازِ جنازہ ادا

سنجاوی کے فٹ بال اسٹیڈیم میں سانحہ زیارت میں شہید ہونے والے 3 پولیس اہلکاروں کی اجتماعی نمازِ جنازہ ادا کر دی گئی۔نمازِ جنازہ میں صوبائی وزیر خوراک و فوڈ اتھارٹی حاجی نور محمد خان دمڑ، ڈی آئی جی سبی رینج پرویز عمرانی، ڈپٹی کمشنر زیارت عبدالقدوس اچکزئی اور ایس پی زیارت عبدالمالک سمیت بڑی تعداد میں عوام اور سرکاری افسران نے شرکت کی۔ صوبائی وزیر حاجی نورمحمد خان دمڑ اور دیگر افسران نے شہدا کے جنازوں کو کندھا دیا”اس موقع پر صوبائی وزیر حاجی نور محمد خان دمڑ نے کہا کہ حکومت اور عوام غم کی اس گھڑی میں شہدا کے لواحقین کے ساتھ کھڑے ہیں۔ سنجاوی، زیارت اور ہرنائی کے عوام نے شہدا کے اہلِ خانہ سے یکجہتی کا اظہار کیا۔دعا کی گئی کہ اللہ تعالیٰ تمام شہدا کو جنت الفردوس میں اعلیٰ مقام عطا فرمائے اور لواحقین کو صبر جمیل عطا کرے۔ شرکاءنے کہا کہ ہمارے شہدا نے پاکستان اور بلوچستان کا نام فخر سے بلند کیا ہے اور ان کی قربانیاں رائیگاں نہیں جائیں گی۔