سوشل میڈیا ایکٹوسٹس کی گرفتاری سے صوبائی حکومت کا کوئی تعلق نہیں،شاہد رند

وزیراعلیٰ کے معاون برائے سیاسی و میڈیا امورشاہد رند نے کہا ہے کہ سوشل میڈیا ایکٹوسٹس کی گرفتاری سے صوبائی حکومت کا کوئی تعلق نہیں، دونوں سوشل میڈیا ایکٹوسٹس کے خلاف ایف آئی اے میں مختلف شکایات پہلے سے موجود تھیں، ایک ایکٹوسٹ کے خلاف دو سرکاری افسران نے ذاتی حیثیت میں شکایات درج کرائیں، دوسرے سوشل میڈیا ایکٹوسٹ کے خلاف ایک شہری کی درخواست پر انکوائری ابتدائی مرحلے میں تھی۔

ایک بیان میں شاہد رند نے کہا کہ ایف آئی اے ایک وفاقی تحقیقاتی ادارہ ہے جو قوانین کے مطابق کارروائی کر رہا ہے، سوشل میڈیا ایکٹوسٹس سے متعلق معاملہ تحقیقاتی ادارے اور عدالت کے درمیان طے ہونا ہے۔انہوں نے کہا کہ صوبائی حکومت آزادی اظہارِ رائے کے آئینی حق پر یقین رکھتی ہے، سرکاری افسران نے اگر قانونی فورم سے رجوع کیا ہے تو حکومت ان کے حق دفاع کی حمایت کرے گی، حکومت بلوچستان قانون کی بالادستی اور ادارہ جاتی ذمہ داریوں کے احترام پر یقین رکھتی ہے۔