پاکستان کا دورہ ویسٹ انڈیز، قومی ٹیم کا پہلے ٹیسٹ میں 7 بیٹرز کے ساتھ میدان میں اترنے کا منصوبہ

قومی کرکٹ ٹیم کی مینجمنٹ نے دورہ ویسٹ انڈیز  میں پہلے ٹیسٹ کے لیے پلیئنگ الیون پر ابتدائی مشاورت شروع کر دی۔

ذرائع کے مطابق قومی ٹیم مینجمنٹ 7 اسپیشلسٹ بیٹرز کے ساتھ میدان میں اترنے کا منصوبہ رکھتی ہے۔

ذرائع نے بتایا کہ اذان اویس، امام الحق، شان مسعود، بابر اعظم اور محمدرضوان پلیئنگ الیون کا حصہ ہوں گے۔

ذرائع کے مطابق سلمان علی آغا بھی پلیئنگ الیون کاحصہ ہوں گے اور  پانچویں بولر کے طور پر استعمال ہوں گے جبکہ عامر جمال اور محمد عباس بھی پلیئنگ الیون کا حصہ ہوں گے۔

لیفٹ آرم اسپیشلسٹ اسپنر علی عثمان کے ٹیسٹ ڈیبیو کا قوی امکان ہے جبکہ خرم شہزاد اور محمد علی میں سے ایک فاسٹ بولر پلیئنگ الیون کا حصہ ہوگا۔

ذرائع کے مطابق قومی ٹیم مینجمنٹ نے بولرز کو اپنی بیٹنگ پر بھی توجہ دینے کی ہدایت کی ہے، جبکہ پلیئنگ الیون کو حتمی شکل دینے سے قبل کھلاڑیوں کی فِٹنس کا بھی جائزہ لیا جائے گا۔

ذرائع کا کہنا ہے کہ برائن لارا کرکٹ اکیڈمی ٹرینیڈاڈ میں گھاس والی پِچ تیار کی جا رہی ہے اور کیوریٹرز کی جانب سے پچ کو ہری گھاس کے بجائے بھوری گھاس سے ڈھانپا گیا ہے۔

خیال رہے کہ پاکستان اور ویسٹ انڈیز کے درمیان پہلا ٹیسٹ کل سے شروع ہوگا۔