گوگل کروم میں ایک بہترین فیچر کا اضافہ

گوگل کی جانب سے کروم ویب براؤزر میں ایک بہت اہم اپ ڈیٹ کی جا رہی ہے۔

ایک رپورٹ کے مطابق گوگل کروم 148 کو اپریل کے وسط میں متعارف کرائے جانے کا امکان ہے۔

جب اسے متعارف کرایا جائے گا تو کروم کے اس نئے ورژن میں روزمرہ کی براؤزنگ کا عمل زیادہ تیز ہو جائے گا۔

رپورٹ کے مطابق گوگل کی جانب سے ویڈیو اور آڈیوز کے لیے لیزی لوڈنگ کی آزمائش کروم میں کی جا رہی ہے۔

اگر آپ کو لیزی لوڈنگ کا علم نہیں، تو جان لیں کہ یہ فیچر غیر اہم اور آف اسکرین ریسورسز کے لوڈنگ کا عمل سست روی سے مکمل کرتا ہے۔

اس کے نتیجے میں پیج لوڈنگ پرفارمنس بہتر ہو جاتی ہے جبکہ بینڈ ودتھ یوزایج گھٹ جاتا ہے۔

مثال کے طور پر آپ کسی ایسی ویب سائٹ پر وزٹ کرتے ہیں جس میں تصاویر کی بھرمار ہوتی ہے تو عام طور پر اس پیج کے تمام عناصر پہلے لوڈ ہوتے ہیں جس کے بعد ہم اس پر براؤزنگ کرتے ہیں۔

لیزی لوڈنگ سے ان تصاویر کی لوڈنگ کچھ دیر کے لیے رک جاتی ہے جن کو اس وقت تک دیکھنا ممکن نہیں ہوتا جب تک اسکرولنگ نہ کی جائے، جس سے پیج کو تیزی سے لوڈ ہونے میں مدد ملتی ہے۔

کروم میں لیزی لوڈنگ سپورٹ موجود ہے مگر یہ فیچر ابھی تصاویر کے لیے کام کرتا ہے مگر اب اسے ویڈیو اور آڈیو تک توسیع دی جا رہی ہے۔

رپورٹ میں بتایا گیا کہ یہ فیچر کروم کے ڈیسک ٹاپ ورژن، اینڈرائیڈ اور آئی او ایس ڈیوائسز کے لیے متعارف کرایا جائے گا۔