مائنز اینڈ منرلز ایکٹ دوبارہ صوبائی اسمبلی میں ٹیبل کیا جائےگا،نیشنل پارٹی

نیشنل پارٹی کے مرکزی ترجمان نے جاری کردہ بیان میں کہا ہے کہ مائنز اینڈ منرلز ایکٹ دوبارہ صوبائی اسمبلی میں ٹیبل کیا جائے گا۔ حکومت نے اپوزیشن جماعتوں سے بل کے حوالے سے باضابطہ تجاویز طلب کی ہیں، جس پر نیشنل پارٹی نے دیگر اپوزیشن جماعتوں کے ساتھ مل کر متفقہ سفارشات مرتب کر کے حکومت کو فراہم کر دی ہیں۔ترجمان نے کہا کہ نیشنل پارٹی ایک مکمل سیاسی و جمہوری جماعت ہے اور مکالمے کو جمہوری عمل کا بنیادی حصہ سمجھتی ہے۔ پارٹی نے گزشتہ بل کے خلاف عدالت میں پیٹیشن دائر کی تھی حکومت نے رجوع کرتے ہوئے بل کو دوبارہ اسمبلی میں لانے کے ساتھ ساتھ اپوزیشن سے تجاویز پیش کرنے کی درخواست کی۔بیان میں کہا گیا کہ نیشنل پارٹی نے اپنی عدالتی پیٹیشن مشروط طور پر واپس لی ہے۔ اگر حکومت اپوزیشن کی سفارشات پر عمل نہ کرے اور بلوچستان کے عوام کے مفادات کا تحفظ یقینی نہ بنایا گیا تو نیشنل پارٹی دوبارہ عدالت سے رجوع کرنے کا حق محفوظ رکھتی ہے۔بیان میں کہا گیا کہ بل میں ترمیم و تبدیلی کی صورت میں سابقہ بل کی عدالتی حیثیت خودبخود ختم ہو جائے گی، اس لیے حکومت کی ذمہ داری ہے کہ وہ اپوزیشن کی سفارشات کو بل کا حصہ بنائے۔ترجمان نے کہا کہ مائنز اینڈ منرلز بل کے حوالے سے غلط پروپیگنڈے سے اجتناب کیا جائے، یہی سیاسی سنجیدگی اور ذمہ داری کی علامت ہے۔