جیونی ،پولیس نے غیرقانونی پاکستان میں داخل ہونے والے47افغان باشندوں کو گرفتار کرلیا

جیونی میں پولیس نے کارروائی کرتے ہوئے غیرقانونی طورپر پاکستان کے راستے ایران جانے کی کوشش کرنے والے 47افغان باسندوں کو گرفتار کرلیا۔ تفصیلات کے مطابق جیونی پولیس نے انسانی اسمگلنگ کے خلاف اہم کارروائی کرتے ہوئے 47 غیر ملکی افغان باشندوں کو گرفتار کر لیا، جو مبینہ طور پر غیر قانونی طریقے سے اسپیڈ بوٹوں کے ذریعے ایران جانے کی کوشش کر رہے تھے۔پولیس حکام کے مطابق کارروائی ڈی ایس پی/ایس ڈی پی او سرکل جیونی زاہد حسین کی نگرانی میں کی گئی، جبکہ ایس آئی/ایس ایچ او سٹی جیونی سب انسپکٹر محمد عارف نے اپنی ٹیم کے ہمراہ چھاپہ مار کارروائی انجام دی۔پولیس کا کہنا ہے کہ گرفتار افراد کے خلاف ابتدائی قانونی کارروائی مکمل کرنے کے بعد انہیں مزید تفتیش اور قانونی تقاضے پورے کرنے کے لیے فیڈرل انویسٹی گیشن ایجنسی گوادر کے حوالے کر دیا گیا ہے۔حکام نے واضح کیا کہ انسانی اسمگلنگ، غیر قانونی نقل و حرکت اور سرحدی علاقوں میں جرائم کی روک تھام کے لیے کارروائیاں مسلسل جاری رکھی جائیں گی تاکہ امن و امان اور قانون کی بالادستی کو یقینی بنایا جا سکے۔