کراچی میں شدیدگرمی کے پیش نظر کےالیکٹرک کی احتیاطی تدابیر اختیار کرنےکی اپیل

کے الیکٹرک نے اپنے صارفین سے اپیل کی ہےکہ وہ تمام ضروری احتیاطی تدابیر اختیار کریں اور صبح 11 بجے سے شام 4 بجے تک جو کہ “شدید گرمی کے اوقات” ہیں، غیر ضروری باہر نکلنے یا سخت جسمانی مشقت سے گریز کریں۔ 

صوبائی ڈیزاسٹر منیجمنٹ اتھارٹی (PDMA) نے کراچی میں شدید گرمی کا الرٹ جاری کرتے ہوئے اس کے اثرات کو کم سے کم کرنے کے لیے تمام ضروری اقدامات کرنے کی ہدایت دی ہے۔

کے الیکٹرک کے ترجمان عمران رانا نے کہاہےکہ  جیسے جیسے بجلی کی طلب میں اضافہ ہورہا ہے، کے الیکٹرک کراچی کو بجلی کی پائیدار فراہمی یقینی بنانے کے لیے مکمل طور پر تیار اور پرعزم ہے، ہماری فیلڈ ٹیمیں کسی بھی خرابی کی صورت میں فوری بحالی کو یقینی بنانے کے لیے الرٹ ہیں۔ تاہم ہم عوام سے بھی درخواست کرتے ہیں کہ وہ موجودہ موسمی حالات پر گہری نظر رکھیں اور شدید گرمی سے متعلق ایس او پیز پر عمل کریں۔ کے الیکٹرک تمام شہری اداروں کے ساتھ رابطے میں ہے اور اپنی بھرپور صلاحیت کے مطابق تعاون کرے گا۔

کے الیکٹرک کا کہنا ہے کہ شدید گرمی کے باعث طلب میں اضافے کے پیشِ نظر کےالیکٹرک اپنے سپلائرز کے ساتھ مسلسل رابطے میں ہے تاکہ بجلی کی فراہمی برقرار رکھی جا سکے۔ کےالیکٹرک کی جانب سے حفاظتی بنیادوں پر ہونے والی مینٹیننس کو معطل کر دیا گیا ہے۔

 پاکستان محکمہ موسمیات کی رپورٹ کے مطابق محسوس کیے جانے والا درجہ حرارت 45 ڈگری سینٹی گریڈ سے تجاوزکرسکتا ہے اور اگر ایسا ہوا تو کےالیکٹرک کی جانب سے معاشی بنیادوں پر ہونے والی لوڈشیڈنگ کو بھی معطل کردیا جائےگا۔

کےالیکٹرک کی اپنے صارفین سے درخواست ہے کہ وہ شدید گرمی کے اوقات میں خصوصی احتیاط برتیں، خود کو پانی کی کمی سے محفوظ رکھیں، ہلکے اور ہوا دار کپڑے پہنیں اور سر کو ڈھانپ کر رکھیں تاکہ براہِ راست دھوپ اور گرمی سے بچا جاسکے۔