3 روزہ جنگ بندی ختم ، روس نے یوکرین پر 800 ڈرونز سے حملہ کر دیا، 6 افراد ہلاک، درجنوں زخمی

روس اور یوکرین کے درمیان3 روزہ جنگ بندی ختم ہوتے ہی  روس نے یوکرین پر کم از کم 800 ڈرونز سے حملہ کر دیا۔

 یوکرین کے صدر وولودیمیر زیلنسکی نے ٹیلی گرام پر  جاری بیان میں دعویٰ کیا ہے کہ بدھ کے روز روس نے دن بھر میں 800 ڈرونز لانچ کیے۔

زیلنسکی نے کہا کہ روس کی جانب سے دارالحکومت کیف، پولینڈ کی سرحد کے قریب مغربی شہر لیوو اور بحیرۂ اسود کی بندرگاہ سمیت دیگر علاقوں کو نشانہ بنایا گیا۔

یوکرینی صدر کے مطابق یوکرین بھر میں روسی ڈرون حملوں میں کم از کم 6 افراد ہلاک اور درجنوں زخمی ہو گئے۔

زیلنسکی نےکہا کہ  ہمارے فوجی یوکرین کا دفاع کر رہے ہیں، لیکن روس کا واضح مقصد فضائی دفاعی نظام پر بوجھ ڈالنا ہے۔ انہوں نے خبردار کیا کہ ڈرون حملوں کے بعد کروز اور بیلسٹک میزائل حملے بھی ہو سکتے ہیں۔

رپورٹ کے مطابق  روس نے نیٹو ملکوں کے ساتھ یوکرین کی سرحد کے قریب مغربی علاقوں کو بھی نشانہ بنایا ۔

غیر ملکی رپورٹس کےمطابق روس نے یوکرین کے انتہائی مغربی خطے زاکارپاتیا کو بھی نشانہ بنایا، جو سلوواکیہ کی سرحد پر واقع ہے۔ سلوواکی حکومت نے کہا کہ وہ ’’سکیورٹی وجوہات‘‘ کی بنا پر زمینی سرحدی کراسنگ کو غیر معینہ مدت کے لیے بند کر رہی ہے۔

ادھر روس میں حکام کا کہنا ہے کہ بدھ کی صبح تک یوکرینی ڈرونز نے 3 صنعتی تنصیبات کو نشانہ بنایا۔ 

واضح رہے کہ یہ تازہ ترین حملے اس کے فوراً بعد سامنے آئے جب امریکا کی ثالثی میں طے پانے والی 3 روزہ جنگ بندی پیر کی رات ختم ہو گئی۔