خطے میں کشیدگی کے بادل ختم ہوئے، امن کیلئے حکومت پاکستان، فیلڈ مارشل، نائب وزیراعظم اور وزیر داخلہ سرگرم عمل رہے: وزیراعظم

وزیرِ اعظم شہباز شریف نے کہا ہے کہ خطے میں کشیدگی کے بادل ختم ہوئے اور امن کے قیام کی کوششیں کامیاب ہوئیں، دوست ممالک کے شکر گزار ہیں جنہوں نے امن کے قیام کی کوششوں میں ساتھ دیا۔

وزیراعظم شہباز شریف سے مسلم لیگ ن کی خواتین ارکانِ پارلیمنٹ نے ملاقات کی۔ شہباز شریف نے خواتین ارکان پارلیمنٹ کا خیرمقدم کیا اور بجٹ اجلاس میں بھرپورشرکت پراظہارتشکر کیا۔

اس موقع پر گفتگو کرتے ہوئے وزیراعظم کا کہنا تھاکہ حکومت نے جس قدر ممکن ہوسکا، بجٹ میں عوام کو ریلیف دینےکی کوشش کی، بجٹ میں خواتین کوخودمختار بنانے اور قومی دھارے میں شمولیت میں اضافے کیلئے اقدامات شامل ہیں اور خواتین کو ملکی ترقی میں کردار کیلئے بااختیاربنانا حکومت کی اولین ترجیحات میں شامل ہے۔

ان کا کہنا تھاکہ خطے میں کشیدگی کے بادل چھٹے اور امن کے قیام کی کوششیں بر آئیں، دوست ممالک کےشکرگزار ہیں جنہوں نے امن کے قیام کی کوششوں میں ساتھ دیا۔

شہباز شریف نے کہا کہ قیامِ امن کے لیے حکومت پاکستان، فیلڈ مارشل، نائب وزیراعظم اور وزیر داخلہ سرگرم عمل رہے، خطے اور عالمی امن کے دیرپا قیام سے ہی پاکستان اور دیگر ممالک کی معاشی ترقی کا خواب پورا ہوگا۔

ان کا مزید کہنا تھاکہ گزشتہ مہینوں میں عالمی مہنگائی کی لہر سے جس قدر ممکن ہوسکا عوام کو بچانے کی کوشش کی، حالیہ حالات میں ملکی معیشت کو مستحکم رکھنے کے لیے وفاق اور صوبوں نے مکمل تعاون کیا۔

ان کا کہنا تھاکہ حکومت نے ہر ممکن طریقے سے بجٹ میں عوام کو ریلیف دینے کی کوشش کی، ملکی معیشت کے استحکام میں عوامی تعاون کا بہت بڑا کردار رہا۔