تفتان بارڈر پر پاک ایران تجارتی ویزا کی بحالی کے بعد تاجروں اور کاروباری طبقے میں خوشی کی لہر دوڑ گئی

تفتان بارڈر پر پاک ایران تجارتی ویزا کی بحالی کے بعد تاجروں اور کاروباری طبقے میں خوشی کی لہر دوڑ گئی ہے۔ اس اقدام سے دونوں ممالک کے درمیان آمد و رفت میں آسانی اور سرحدی تجارت کے فروغ کی نئی راہیں کھل گئی ہیں۔پاک ایران ایف آئی اے امیگریشن گیٹ تفتان سے پاکستانی تاجروں کے لیے تجارتی ویزا کی سہولت دوبارہ بحال کر دی گئی ہے۔ ایران اور اسرائیل کے درمیان کشیدگی کے باعث یہ سہولت عارضی طور پر معطل کر دی گئی تھی، تاہم ہوم ڈیپارٹمنٹ بلوچستان کے نوٹیفکیشن کے بعد تقریباً ایک سال بعد اسے دوبارہ فعال کر دیا گیا ہے۔ تجارتی ویزا کی بحالی سے تاجروں کو کاروباری سرگرمیوں میں سہولت میسر آئے گی جبکہ دونوں ممالک کے درمیان تجارتی روابط مزید مضبوط ہوں گے۔ مقامی تاجروں نے اس فیصلے کا خیرمقدم کرتے ہوئے اسے سرحدی تجارت، مقامی معیشت کی بہتری اور روزگار کے نئے مواقع پیدا کرنے کی جانب اہم پیش رفت قرار دیا ہے۔