بھارت نے پہلی ڈینگی ویکسین کی منظوری دیدی

ڈینگی بخار مچھروں سے پھیلنے والی عام بیماری ہے جس سے ہر سال پاکستان سمیت دنیا بھر میں لاکھوں افراد متاثر ہوتے ہیں۔

اس بیماری میں تیز بخار کے ساتھ فلو (flu) جیسی علامات کا سامنا ہوتا ہے۔

البتہ زیادہ بیمار ہونے پر جریان خون اور موت کا خطرہ بڑھ جاتا ہے۔

پاکستان کے ساتھ ساتھ بھارت بھی ڈینگی سے زیادہ متاثر ہونے والے ممالک میں شامل ہے اور اسی وجہ سے بھارت نے پہلی ڈینگی ویکسین کے استعمال کی منظوری دی ہے۔

بھارتی وزارت صحت کے مطابق جاپانی کمپنی ٹاکیڈا کی تیار کردہ Qdenga ویکسین کے استعمال کی منظوری 21 جولائی کو دی گئی۔

بھارتی ادارے سینٹرل ڈرگز اسٹینڈرڈ کنٹرول آرگنائزیشن نے 4 سے 60 سال کی عمر کے افراد کے لیے اس ویکسین کی منظوری دی۔

ویکسین کی منظوری سے قبل اس کے معیار، افادیت اور محفوظ ہونے کی آزمائش کی گئی تھی اور پھر منظوری دی گئی۔

ادارے کی جانب سے جاری بیان میں بتایا گیا کہ ویکسین سے 4 سے 60 سال کی عمر کے افراد کو ڈینگی جیسے سنگین مرض سے بچنے میں مدد ملے گی۔

یہ ویکسین 3 ماہ کے دوران 2 انجیکشن کے ذریعے استعمال کرائی جاتی ہے۔

جاپانی کمپنی نے اس کی تیاری کے لیے ایک بھارتی کمپنی بائیولوجیکل ای کے ساتھ شراکت داری کی ہے۔

یہ ویکسین ڈینگی کی چاروں اقسام کے خلاف تحفظ فراہم کرتی ہے اور اب تک 42 ممالک میں اس کے استعمال کی منظوری دی جاچکی ہے۔

دنیا بھر میں اس کی 2 کروڑ 40 لاکھ خوراکیں استعمال کی جاچکی ہیں اور اب تک کوئی خاص مضر اثرات بھی سامنے نہیں آئے۔

واضح رہے کہ بھارت میں 2021 سے اب تک ڈینگی کے 10 لاکھ سے زائد کیسز رپورٹ ہوچکے ہیں جبکہ 1500 اموات ہوئیں۔

بھارت کی جانب سے اپنی ڈینگی ویکسین کی تیاری پر بھی کام کیا جا رہا ہے جو کہ دنیا کی پہلی سنگل ڈوز ڈینگی ویکسین ہوگی۔