بلاول برخوردار!کشمیر کو کشمور، میرپور کو میرپور خاص نہ سمجھنا، نواز شریف

پاکستان مسلم لیگ (ن) کے صدر قائد اور سابق وزیراعظم نواز شریف نے کہا ہے کہ بلاول برخوردار بھٹو کشمیر کو کشمور اور میرپور کو میرپور خاص نہ سمجھنا،بلاول بھائی میری بات کا برا بھی نہیں ماننا یہ نوک جھونک پارٹیوں میں ہونی چاہیے، مار کٹائی نہیں،آزاد کشمیر کےلئے میری حکومت کے بعد کسی بھی حکومت نے کچھ نہیں کیا اور موٹروے کا منصوبہ پورا نہیں کیا، بتائیں (ن )لیگ کے سوا کسی نے آزاد کشمیر کیلئے کچھ کیا ہو؟ پاکستان اور آزاد کشمیر کے ہر منصوبے پر (ن )لیگ کی مہر نظر آئے گی،ہماری اولین ترجیح نوجوانوں کو تعلیم دینا ہے، آزاد کشمیر میں بھی کینسر اور دل کے امراض کے بے شمار ہسپتال بننے چاہئیں، مریم یہاں پر جدید ترین الیکٹرک بسیں اور10 موبائل ہسپتال بھی لے کر آرہی ہیں،مسلم لیگ (ن )کی حکومت بنی تو کشمیر میں موٹرویز بنائیں گے، مری سے مظفرآباد تک ایکسپریس ویز بنائیں گے، آپ نے مسلم لیگ ن کو کامیاب کروایا تو کشمیر کے چپے چپے خود جاﺅں گا، میرپور کے گھر گھر میں گیس کی سہولت ہوگی، میرپور میں بین الاقوامی ایئرپورٹ ہونا چاہیے۔ جمعہ کو پاکستان مسلم لیگ (ن)کے قائد اور سابق وزیراعظم نواز شریف نے جلسے سے خطاب کرتے ہوئے کہا کہ میرپور اتنا خوب صورت شہر ہے لیکن جتنا خوب صورت ہونا چاہیے تھا اتنا نہیں ہے اور اپنے دور کے میرے کام ادھورے پڑے ہوئے پروان نہیں چڑھ سکے۔انہوں نے کہا کہ ہم یہ عہد لے کر آئے ہیں کہ میرپور اور آزاد کشمیر کی تقدیر بدل دیں گے، میرے وزارت عظمیٰ سے جانے کے بعد میں خاموش رہا لیکن کشمیر میں کوئی ترقی نہیں ہوئی، میں ان حکومتوں سے پوچھنا چاہتا ہوں جو نواز شریف کی حکومت کے بعد آزاد کشمیر اور پاکستان میں آئیں اس نے آزاد کشمیر کےلئے کیا کیا ہے اگر کچھ کیا ہے تو مجھے بتاﺅ۔انہوںنے کہاکہ کشمیر میں اپنا گھر سمجھتا ہوں، کشمیر میرا پہلا گھر ہے، مجھے لاہور بھی پیارا اور کشمیر بھی اتنا ہی پیارا ہے۔