کچے میں ’دہشت کی علامت‘ سمجھے جانے والے ڈاکو کا سرینڈر

پاکستان کے صوبہ پنجاب کی پولیس نے دعویٰ کیا ہے کہ رحیم یار خان میں ’کچے کے علاقے کے سب سے خطرناک ڈاکو‘ تنویر اندھڑ نے اپنے ساتھی ظفری جبھیل کے ہمراہ سرنڈر کر دیا ہے۔

رحیم یار خان پولیس کے ڈسٹرکٹ پولیس آفیسر (ڈی پی او) عرفان سموں کے مطابق سرینڈر کرنے والا ڈاکو ’اندھڑ گینگ کا سرغنہ ہے اور وہ قتل اور ڈکیتی سمیت درجنوں وارداتوں میں پولیس کو مطلوب تھا۔‘

پولیس کے مطابق رحیم یار خان میں سرینڈر کرنے والے ڈاکوؤں کی کل تعداد 229 ہو گئی ہے۔ پولیس کا یہ بھی دعویٰ ہے کہ اب تک آپریشن میں 69 ڈاکو ہلاک اور 97 ڈاکوؤں کو زخمی حالت میں گرفتار کیا گیا ہے۔

یہ پنجاب پولیس کو درجنوں مقدمات میں مطلوب کچے کے علاقے میں سرگرم تنویر اندھڑ اور ان کے ساتھی ظفری جبھیل کے سرینڈر کی رُوداد ہے جن کے سر کی قیمت ایک کروڑ روپے مقرر تھی۔