وہ عام غلطی جو لیپ ٹاپ کی زندگی کو مختصر بنا دیتی ہے

بیشتر افراد لیپ ٹاپ کو گود میں رکھ کر استعمال کرتے ہیں جو انہیں زیادہ بہتر محسوس ہوتا ہے۔

ویسے بھی لیپ ٹاپ کو کسی بھی جگہ لے جایا جاسکتا ہے اور کہیں بھی رکھ کر استعمال کیا جاسکتا ہے۔

مگر کسی نرم سطح پر لیپ ٹاپ کو رکھ کر استعمال کرنا اس کی زندگی کو جلد ختم کر دیتا ہے۔

لیپ ٹاپ کو کسی نرم تکیے، گود، کشن یا بستر پر رکھنے سے اس کے فین (پنکھے) کو رکاوٹ کا سامنا ہوتا ہے جس سے ہوا کا بہاؤ بلاک ہو جاتا ہے۔

اس سے لیپ ٹاپ زیادہ گرم ہو جاتا ہے کیونکہ پنکھے کو ڈیوائس کو ٹھنڈا رکھنے کے لیے زیادہ کام کرنا پڑتا ہے۔

یہ دباؤ یا تناؤ وقت گزرنے کے ساتھ لیپ ٹاپ کے مختلف حصوں جیسے بیٹری کو نقصان پہنچاتا ہے اور لیپ ٹاپ کی کارکردگی بھی متاثر ہوتی ہے۔

اس کی ایک بڑی نشانی تو یہ ہوتی ہے کہ لیپ ٹاپ کے پنکھے کی آواز زیادہ بڑھ جاتی ہے جبکہ وہ جلد گرم ہونے لگتا ہے۔

اگر آپ بستر، صوفے، فرش یا اپنی گود میں لیپ ٹاپ استعمال کرنا چاہتے ہیں تو اس بات کو یقینی بنائیں کہ وہ کام کے دوران زیادہ گرم نہ ہو۔

اس کے لیے کولنگ پیڈ کو استعمال کیا جاسکتا ہے جو لیپ ٹاپ کو ٹھنڈی ہوا فراہم کرتے ہیں۔

ان پیڈز کا مقصد ہی یہ ہوتا ہے کہ لیپ ٹاپ گرم ہونے سے بچائیں، اگر وہ موجود نہیں تو لیپ ٹاپ کو اس طرح استعمال کریں کہ وہ نرم سطح سے ذرا اونچا ہو۔

لیپ ٹاپ کے زیادہ گرم ہونے پر اس کا استعمال روک دینا چاہیے تاکہ ڈیوائس کو نقصان نہ پہنچے۔