دنیا کا وہ واحد منفرد برج جہاں آپ 4 ممالک کو بیک وقت دیکھ سکتے ہیں

دنیا بھر میں متعدد متاثر کن برجز موجود ہیں جن کا تعمیراتی انداز کافی مختلف ہوتا ہے۔

مگر دنیا کا ایک برج بہت زیادہ منفرد ہے کیونکہ وہاں سے آپ بیک وقت 4 ممالک کو دیکھ سکتے ہیں۔

یہ ہے افریقی ملک زیمبیا کا Kazungula برج، جو تعمیراتی لحاظ سے دنیا کا خوبصورت ترین برج نہیں، مگر اس کی جغرافیائی پوزیشن اسے خاص بناتی ہے۔

دریائے زیمبیزی پر واقع یہ برج دنیا کے چند عجیب ترین مقامات میں سے ایک پر تعمیر کیا گیا ہے جو زیمبیا اور بوٹسوانا کو ایک دوسرے سے منسلک کرتا ہے۔

3028 فٹ طویل اور 61.7 فٹ چوڑے برج میں 2 لینز موجود ہیں جبکہ ایک سنگل ریلوے ٹریک اور پیدل چلنے والوں کا راستہ بھی موجود ہے۔

یہ مئی 2021 میں عوام کے لیے کھولا گیا مگر زیادہ حیران کن بات یہ ہے کہ اگرچہ یہ زیمبیا اور بوٹسوانا کو جوڑتا ہے مگر 2 دیگر ممالک نمیبیا اور زمبابوے بھی دائیں بائیں موجود ہیں۔

تو اس برج کو 2 ممالک کی سرحدوں کو عبور کرنے کے لیے بنایا گیا مگر دیگر 2 کو مکمل طور پر نظر انداز کر دیا گیا۔

البتہ اس پر سے گزرتے ہوئے آپ بوٹسوانا، نمیبیا، زیمبیا اور زمبابوے کی سرحدوں کو بیک وقت دیکھ سکتے ہیں اور اسے دنیا کی دوسری مختصر ترین سرحد بھی قرار دیا جاتا ہے۔

مگر اس غیرمعمولی جغرافیائی مقام کے ساتھ چند دلچسپ حقائق اور بھی جڑے ہیں۔

نقشوں سے ثابت ہوتا ہے کہ یہ دنیا کا واحد خطہ ہے جہاں 4 ممالک کی سرحدیں آپس میں ملتی ہیں۔

متعدد ممالک کی سرحدیں 2 یا 3 ممالک کے ساتھ جڑی ہوتی ہیں مگر یہ بہت غیرمعمولی ہے کہ ایک دریا کے وسط میں 4 ممالک آپس میں جڑے ہوئے ہیں۔