کوئٹہ میں بجلی کی غیر اعلانیہ اور طویل لوڈشیڈنگ عوام کےلئے عذاب بن چکی ہے

جمعیت علماءاسلام ضلع کوئٹہ کے امیر شیخ الحدیث مولانا عبدالرحمن رفیق، سیکرٹری جنرل حاجی عین اللہ شمس، سینئر نائب امیر مولانا خورشید احمد، حاجی بشیر احمد کاکڑ، سیکرٹری مالیات حاجی صالح محمد، مفتی رضا خان، حاجی ظفر اللہ کاکڑ، میر سرفراز شاہوانی، میر حشمت لہڑی، سیٹھ اجمل بازئی، سالار مولوی علی جان، مولانا سید سعد اللہ آغا اور مولوی نقیب اللہ ملاخیل نے کہا ہے کہ کوئٹہ شہر میں بجلی کی غیر اعلانیہ اور طویل لوڈشیڈنگ عوام کے لیے ناقابلِ برداشت عذاب بن چکی ہے۔ شدید گرمی کے موسم میں شہر کے بیشتر علاقے گھنٹوں بجلی سے محروم رہتے ہیں جس کے باعث شہریوں کو شدید مشکلات اور ذہنی اذیت کا سامنا ہے۔انہوں نے کہا کہ طویل لوڈشیڈنگ کے نتیجے میں مختلف علاقوں میں پانی کا بحران سنگین صورت اختیار کر گیا ہے۔ بجلی کی عدم دستیابی کے باعث ٹیوب ویلز بند پڑے ہیں جبکہ ٹینکر مافیا اس صورتحال سے ناجائز فائدہ اٹھاتے ہوئے شہریوں سے من مانے نرخ وصول کر رہی ہے۔ گھریلو صارفین شدید گرمی میں بنیادی سہولیات سے محروم ہو کر کربناک حالات سے دوچار ہیں۔