امریکی صدرکی نظر دنیا کی دولت پر ہے، خطےکے وسائل پر قبضےکیلئے بے امنی پھیلائی گئی ہے: فضل الرحمان

چارسدہ: جے یو آئی کے سربراہ  مولانا فضل الرحمان کا کہنا ہےکہ امریکی صدر کی نظر دنیا کی دولت پر ہے، خطے کے وسائل پر قبضے کے لیے بے امنی پھیلائی گئی ہے۔

چارسدہ میں تقریب سے خطاب میں مولانا فضل الرحمان کا کہنا تھا کہ  جب تک  برصغیر میں علماء کی حکومت تھی تو امن تھا، جب سے علماء  سے قیادت چھینی گئی  بے امنی بڑھ گئی۔

 مولانا فضل الرحمان کا کہنا تھا کہ  فرقہ واریت کو ہوا دی گئی تو  ہم  نے اس کا راستہ روکا، الیکشن میں ہمارے ساتھ دھاندلی ہوئی، جس کا اعتراف بھی کیا گیا، اس الیکشن پر شہباز شریف حکومت کرےگا اور میں اسے جائز مانوں گا؟ الیکشن کا اصلی نتیجہ دیا  جائے  ورنہ اسمبلی  میں آرام  سے  نہیں بیٹھنے دوں گا۔

ان کا کہنا تھا کہ بھارت  کے ساتھ جنگ  اور امریکا ایران ثالثی میں ہم نے آپ کو سپورٹ کیا، صدر مملکت نے عمربھر کے لیے خود کو استثنیٰ دے دیا، غریب کو  روٹی نہیں ملتی اور حکمران عیاشی کرتے ہیں،  اگر ملک چلانا ہے تو جے یو آئی کا راستہ کھولنا ہوگا، پاکستان کی سیاست آئین و دلیل کی نہیں قوت کی سیاست ہے، افغانستا ن کے ساتھ مسائل بھی مذاکرات سے حل کیے جائیں۔