کیا آنکھوں کے نیچے سیاہ حلقے کسی بیماری کا نتیجہ ہوسکتے ہیں؟

آنکھوں کے نیچے سیاہ حلقوں کی موجودگی ایک عام مسئلہ ہے اور اکثر اس کے ساتھ وہ حصہ پھول بھی جاتا ہے۔

عموماً آنکھوں کے نیچے موجود سیاہ حلقوں کو تھکاوٹ یا نیند کی کمی کا نتیجہ قرار دیا جاتا ہے مگر اس کی متعدد وجوہات ہوسکتی ہیں۔

اکثر یہ سیاہ حلقے تشوش کا باعث نہیں ہوتے اور کسی قسم کا علاج کرانے کی ضرورت بھی نہیں ہوتی۔

مگر کئی بار یہ حلقے کسی بیماری کی جانب اشارہ بھی ہوتے ہیں۔

امریکا کے مایو کلینک کے مطابق کئی بار آنکھوں کے سیاہ حلقے خون کی شریانوں میں مسائل کے نشانی بھی ہوتے ہیں۔

شریانیں پھول جانے سے کسی ایک آنکھ کے نیچے حلقے نظر آنے لگتے ہیں۔

جب الرجی ری ایکشن کا سامنا ہوتا ہے تو ردعمل میں جسم مخصوص کیمیکلز کو خارج کرتا ہے، جس سے مختلف علامات بشمول خارش، سرخی اور آنکھیں پھول جانے کا سامنا ہوتا ہے۔

یہ کیمیکلز خون کی شریانوں کو پھیلا دیتے ہیں جس سے وہ جلد کے قریب زیادہ نمایاں ہوجاتی ہیں۔

جب جسم کو مناسب مقدار میں پانی دستیاب نہیں ہوتا تو آنکھوں کے نیچے موجود جلد کی رنگت ماند پڑجاتی ہے اور آنکھیں دھنسی ہوئی محسوس ہوتی ہیں۔

طبی ماہرین کے مطابق سورج کی روشنی میں زیادہ گھومنے سے جسم میں میلانین زیادہ بننے لگتا ہے۔

میلانین ہماری جِلد کی رنگت کا تعین کرتا ہے اور جب جسم میں اس کی مقدار بڑھ جاتی ہے تو آنکھوں کے نیچے سیاہ حلقے بھی نمودار ہو جاتے ہیں۔