ٹک ٹاک میں ایک نئے اے آئی فیچر میم ری مکسر کا اضافہ

ٹک ٹاک کی جانب سے آرٹی فیشل انٹیلی جنس (اے آئی) ٹیکنالوجی پر مبنی ایک ایسے فیچر کی آزمائش کی جا رہی ہے جو اس ویڈیو شیئرنگ ایپ میں کمنٹس کے استعمال کا تجربہ بدل دے گا۔

کمپنی کی جانب سے اے آئی پر مبنی میم (meme) میکر ٹول کی آزمائش کی جا رہی ہے۔

کمپنی نے بھی فیچر کی آزمائش کی تصدیق کی ہے۔

اس فیچر کے تحت ٹک ٹاک میں ایک نئی سیٹنگ کا اضافہ کیا جا رہا ہے جس سے خودکار طور پر دیگر افراد کو آپ کے مواد کو اے آئی کی مدد سے ری مکس کرنے کی اجازت مل جائے گی، ماسوائے اگر آپ اس فیچر کو ٹرن آف کر دیں۔

اسے میم ری مکسر کا نام دیا گیا ہے اور ہر فرد آپ کی ٹک ٹاک ویڈیو سے اے آئی پر مبنی تصویر تیار کرسکے گا، چہرہ، آواز یا پس منظر کو تبدیل کرسکے گا۔

مثال کے طور پر آپ کسی ہوٹل میں وزٹ کی ویڈیو ٹک ٹاک پر پوسٹ کرتے ہیں، تو دیگر افراد میم ری مکسر کو استعمال کرتے ہوئے ایک اے آئی تصویر تیار کرسکیں گے جس میں آپ ساحل پر یا کسی اور جگہ نظر آئیں گے۔

ان تصاویر کو اوریجنل ویڈیو کے کمنٹس میں شیئر کیا جاسکے گا۔

کمپنی کے مطابق یہ کمنٹس میں تصاویر پوسٹ کرنے کے لیے ایک بہترین فیچر ہے۔

واضح رہے کہ حالیہ مہینوں میں ٹک ٹاک میں متعدد اے آئی فیچرز متعارف کرائے گئے ہیں جن میں سے ایک ٹاکو یا ٹک ٹاک کا اے آئی اسسٹنٹ بھی شامل ہے۔

کمپنی کے مطابق میم ری مکسر فیچر ابھی تجرباتی مرحلے سے گزر رہا ہے اور تمام افراد کو دستیاب نہیں۔

ٹک ٹاک نے ابھی واضح نہیں کیا کہ یہ کب تک تمام افراد کے لیے متعارف کرایا جائے گا، مگر کمپنی کے مطابق اس میں مزید تبدیلیاں کیے جانے کا امکان ہے۔