جامعہ تربت میں پی ایم یو-بی ای ایس پی 400 اسکالرشپ پروگرام کا تحریری ٹیسٹ 12 جولائی کو ہوگا

بلوچستان کی انٹرمیڈیٹ پاس طالبات کے لیے مکمل مالی معاونت پر مبنی پی ایم یو-بی ای ایس پی 400 اسکالرشپ پروگرام کا تحریری ٹیسٹ اتوار، 12 جولائی 2026ءکو جامعہ تربت کے ملٹی پرپز ہال میں منعقد ہوگا۔ یہ ٹیسٹ ہائر ایجوکیشن کمیشن کے ذیلی ادارے ایجوکیشن ٹیسٹنگ کونسل (ای ٹی سی) کی زیر نگرانی لیا جائے گا۔جامعہ تربت کے ترجمان کے مطابق وائس چانسلر کی خصوصی ہدایات پر یونیورسٹی انتظامیہ نے امیدوار طالبات کی سہولت کے لیے مفت ٹرانسپورٹ فراہم کرنے کا فیصلہ کیا ہے۔ ٹیسٹ کے روز صبح ٹھیک ساڑھے 8 بجے یونیورسٹی بسیں سٹی کیمپس (لاءڈیپارٹمنٹ) سے روانہ ہوں گی، جو امیدواروں کو یونیورسٹی کے مین کیمپس تک پہنچائیں گی۔ اعلامیہ میں امیدواروں کوہدایت کی گئی ہے کہ وہ اپنی اصل تعلیمی اسناد اور دستاویزات ضرور ساتھ لائیں اور ٹیسٹ میں شامل ہونے سے پہلے تعلیمی اسناد اور دستاویزات کی تصدیق یونیورسٹی کے مین کیمپس میں شعبہ انگلش کے روم نمبر بی سی 4 میں ضرور کروائیں۔ تمام امیدواروں کے لیے لازمی ہے کہ وہ اپنے ہمراہ رائٹنگ بورڈ (گتہ) اور کالے یا نیلے رنگ کا بال پوائنٹ قلم ضرور لائیں۔ علاوہ ازیں، تمام امیدواروں کو یہ بھی ہدایت کی گئی ہے کہ وہ اپنی رول نمبر سلپ پر درج دیگر تمام ضوابط اور ہدایات پر عمل درآمد کو یقینی بنائیں۔